मंजूर होते

नाव ते ह्रदयावरूनी खोडणे मंजूर होते
वाकणे जमलेच नाही, मोडणे मंजूर होते

पापण्यांतच बांधलेली पाखरे त्याच्या स्मृतींची
लाडकी होती तरीही सोडणे मंजूर होते

भासला भगवंत जो, तो कोरडा पाषाण होता
मूर्त ती अपुल्याच हाती फोडणे मंजूर होते

आटला नजरेतला जेव्हा उमाळा भावनांचा
वाळली सगळीच नाती तोडणे मंजूर होते

सोडुनी वहिवाट ज्यांनी पाळली वेडे निराळी
नाव त्या गणतीत माझे जोडणे मंजूर होते..