पुरणपोळी (लावणी)

विसरा लाडू, विसरा पेढे, मीच लाडकी सगळ्यांची
गं बाई मी पुरणपोळी चितळ्यांची

इतर : गं बाई चितळ्यांची.. गं बाई चितळ्यांची...

कोल्हापुरास्नं आनला गुळ पिवळा सोन्यावाणी
अन डाळ निवडाया बशिवल्या चार जणी
पुरण शिजता, दरवळ सुटता
गर्दी दारी कावळ्यांची
गं बाई मी पुरणपोळी चितळ्यांची

भरडली वेलची नीट काढुनी साले
अन पाट्यावरती पुरण बाई वाटले
नकोच तोरा, नको हुशारी
फूडप्रोसेसरवाल्यांची
गं बाई मी पुरणपोळी चितळ्यांची

मुखडा माझा गोल चांदवा भासे
अन गालावरती लालसर डाग जरासे
धार तुपाची वरी सोडता
फे फे भल्याभल्यांची
गं बाई मी पुरणपोळी चितळ्यांची